Puntu de oro pro sa Brigada Tattharesa a Cesena, Casteddu perdet sa gara ma binchet s’onore a Napoli, Olbia torrat a ruere malamènte in domo sua.
Torres
Sa Torres no si codiàt su trenu de sos meres de su girone e narat chi sa gara pro su cumandu no finit incue ma est semper abberta. Colat innanti su Cesena a su minutu 48 cun Shpendi cando profitat de sa fùa de Kargbo, chi coglionat sa defesa sarda. Abbastant a sa Torres tres minutos pro apparinare sos contos. Scotto donat una bòcia galana in sa mesania de s’area, Zecca accoglit e faghet su ponte pro Fischnaller, chi guasi mai faddit, mancu custa orta: 1-1. Sos tattharesos abbaidant como a Pineto, ca donzi gara est como una finale, pro sighire a onorare su caminu fatu a pun’innanti.
Olbia
No potimus narrere sa matessi cosa pro sos olbiesos, chi bruscant tres ciaffos intro e domo contra su Pontedera de s’ex Canzi, chi puru at cherfidu ‘ene a s’iscuadra terranoesa. Zanchetta cheret imitare Gatti e violàt sa porta sua matessi, passende malamente sa boccia a Rinaldi, ch’ispantadu no resessit a impedire s’autogol. Sa tzente isetat chi sa ‘ettia de s’Olbia mudet in atza, ma oe no est dieona. Su giogu abbarrat lenu e Delpupo profitat cund’una giogada personale e cuntzat sa partida: 2-0 a su minutu 49. Ragatzu e Nanni, bi pròant a la torrare a aberrere, ma su coro no bastat pius e sos toscanos sinnant sae tres puru. Ianesi che brincat Zallu e cund’unu destru a giru subra su segundu palu binchet sa resistentzia de Rinaldi, bardianu chena gurpa. Pontedera 3, Olbia 0. Sa curva frusciat innanti a sos meres isvitzeros. No isco si issos agradessint, de seguru cumprendent chi toccat de meighina, ranchida cantu si siat…
Casteddu
Casteddu giogat chena timore contra sa coratzada napoletana. Sa defesa mustrat totu su metzoru preguantadu dae Mastru Ranieri e frimmat su primu tempus subra su 0-0 cun Nandez chi accoglit unu cumbidu galanu de Makoumbou e fùit lestru che lepere. Meret devet faghere su meraculu pro sarvare sa porta sua. In su segundu tempus bintrat Luvumbo in logu de Oristanio e atzendet subitu sa lughe pro Casteddu, tando bi bensat Osimhen, chi orioladu profitat de su cross galanu donadu dae Mario Rui e de conca umfiat sa rete. Est su minutu 69. In àteros tempos fit potidu essere s’incomintzu de s’innenna pro su Napoli e de su suplìissiu pro Casteddu. Ma como sas cosas sunt mudadas e Pavoletti, in campu dae incomintzu apparinat totu ses minutos in-fatu. Luvumbo si giogat sa defesa napoletana e donat sa bòcia a su capitanu, intro ‘e s’area minore e Pavoletti ischimus chi no perdonat. Pius lestru de Juan Jesus gèlat su tribuna napoletana: 1-1. Semper Osimhen ponet remediu a su perigulu tratzadu in campu dae sos sardos, mantenet sa boccia attacada a su pè in mesu a battor omines e pustis la donat galana a Kvara su campione georgianu chi no faddit. Napoli 2, Cagliari 1, gasì isponet sa gara, binchida dae sos campione de Italia, contra un’iscuadra chi como s’est ambientada in sa seri A e no timet pius a niune. Su Verona est avertidu.
Mario Bua Capitta, Amistade
