S’isbatzinàda de Gigi Scotto ajuat sa Torres a bolare. Sa Brigada Tattharesa che brincat sa rocca de Pineto e abbarrat in sa punta ‘e sa serie C, accurtzu a su Cesena cabulista. Un’àtera finale binchida pro sos sardos in sa semida de un’isperu beru, gratzias a sa balia de s’animu donadu dae s’atza de attacare sa contra e dae s’ischire cunservare sa calmesa in sos mamentos pius difitziles de sa gara. B’est su tantu de podere ‘isare.
Olbia in cambiu sighit a imbocinare sena pasu, ca como no est fatzile a nudda de si torrare a pesare a sa ritza. S’iscuadra sarda no mancat de omines, balentes puru, totu ischimus e no chertzo fagher’nomenes. S’idet su tribagliu fatu, né mancat sa bona voluntàde. Su giogu e s’identidade però che sunt bandidende subra sos montes chi dae attesu parent umbras…
Pro Casteddu s’arrejonamèntu mudat e meda puru. Ranieri est sìndigu e Giudice no solu de Casteddu, e sos omines sordados de su Giudicadu sardu, chi in campu si chircant e s’ajuant a pare, pontzende innanti su bene comune. E tando it’at bennidu a mancare deris, in una de sas garas de importu pius mannu de tota s’annada de sa serie A?… Seguru chi s’arbitro, a Verona mannu solu de numene, pagu at ajuadu s’ispiritu de sa gara. C’at bogadu a foras cun presse manna, s’omine pius balente finas a tando. In su dubiu at invalidadu sa rete de Goldaniga, bona pro su 90 pro chentu de sos giudicantes. Totu custu però no potet essere un’iscuja bona pro Casteddu. Deo creo chi Casteddu devet furriare a sas faddinas suas pro chircare metzoru. Ranieri in primis no at’apidu su coragiu de che bogare Makoumbou coladu su primu ammunimentu, isse aiat devidu bidere chi s’arbitro fit chirchende sa gloria sua. Ma in cabu a totus, s’iscuadra aiat devidu immentigare o ammentare s’ajudu retzidu dae sa bona sorte in sos urtimos tempos, chi forsis in cara a unu Verona chi no balet s’iscuadra nostra, at bogadu a pizu unu pagu e presùmu. Solu cun umirtàde nos potimus sarvare.
Bonas Pascas de Nadale a totus,
Mario Bua Capitta, Amistade
