Remuntada terranoesa in unu segundu tempus de ammentare, tando sos sardos torrant a binchere.
Primu tempus de immentigare pro sos olbiesos chi guasi mai resessint a oriolare su bunker de sa Fermana, semper atenta a tancare donzi aidu e prontos a profitare ‘e una sola drommida de sa difesa ‘e domo, cando Eleuteri si giogat s’omine sou e dae s’ala destra liberat una boccia galana: Montini lassadu a sa sola in sa mesania de s’area, cun sa conca no lassat iscampu a Rinaldi. Olbia 0, Fermana 1, fit su minutu 12. Su segundu tempus lassat logu a s’atza connotta de sos olbiesos, chi cun s’intrada in campu de Cavuoti e Zallu, in logu de Arboleda e Contini, leant in manos seguras sa briglia de su cumandu e a su minutu 65 accoglint sos primos frutos: su destru a girare de Ragatzu, servidu in area dae Nanni est unu de classe nodida. Nudda potet su bardianu istrantzu: 1-1. Fit su minutu 65 e sos marchigianos incomintzant tando a timire: ammonidu Laverone in boza de perdere tempus pro mantennere su pareggiu, ma Olbia no est cumbinchida e sighit a attacare cun tota sa balia.
A su minutu 72, Nanni rupit intro s’area istranza e Spedalieri orioladu proat a lu frimmare cun sas malas, s’arbitro est incue accurtzu e no at dubiu perunu e donat su rigore a s’Olbia. Ragatzu isbatzinat a cantu potet, sa boccia paret bene puntada ma Furlanetto, bardianu istrantzu giompet a su meraculu. Tiru paradu e delusione manna. Ma s’scuadra ‘e domo no perdet s’animu ‘onu e sighit a ispinghere, cun Ragatzu matessi e Cavuoti chi imbadinant sa defesa de sa Fermana e cando su pareggiu paret torra unu destinu ingratu, tando bi pensat s’àteru Daniele: Dessena coglit unu ponte galanu de Bellodi e a bolu, cun su pè manchinu che unfiat sa rete a bitzefe. Nudda potet su bardianu e incomintzat sa festa manna tra sa tzente chi mai at ispostu de donare curagiu a sos piseddos. Sa Fermana bi proat ancora ma est semper Olbia chi s’accurtziat pius a sa rete, fintzas e a su minutu 96, cando s’arbitro frusciat tres bortas: Olbia cun una gara in mancu, ponet in bertula tres gemmas de oro, giompet a sae 11 puntos e bidete unu tempus bennidore lughente.
Mario Bua Capitta (Amistade)
