Casteddu fit Casteddu antigamente, cando Gigi faghiat timire su mundu.
Chenapura a serantina amus bidu una tuccada pagu nòdida, cando sos sentidos de s’anima ant lassadu logu a s’ammentu e a su piantu, sos gherradores de su Trau rùju ant profitadu sena dolu. Beru chi su Cagliari at leadu sa segunda rete a su minutu 48 de su primu tempus, cando niune lassat sa janna de sa porta abberta, ma beru puru chi sos piemontesos aiant potidu cuntzare su primu tempus cun tres o fintzas battor retes de avantàgiu si Scuffet no aiat’apidu impitadu totu su talentu sou mannu. In su segundu tempus sos sardos ant lassadu sa tristesa in s’apposentu de su campu e tando su Torino at incomintzadu a timire, ma sa defesa sua est forte, issos ant giogadores comente Buongiorno, chi pagas bòcias lassant a sa còntra. E tando?..tando bi cheriat unu manchinu de oro, c’at furriadu a domo àteros ammentos. E cando Viola at pesadu bratzos a chelu, tando l’amus bidu totu umpare. Duos sunt sos ammentos chi ant a abbarrare in s’istoria, duos chi sinnant sa furriada a sa domo ‘e sa mama, de Gigi Riva: sa perdida in domo còntra su Torino, ma pius de totu una gemma de oro, sae Viola, mancari no siet abbastàda pro apparinare una gara perdida in su primu tempus.
Olbia no paret beru, in sa prima Dominiga de su mastru nou, torrat a binchere còntra s’Arezzo, pustis de sete perdidas, una fatu a s’àtera. Ischimus totu chi Gaburro no connoschet s’arte ‘e sa maghia, ma est seguru chi s’isetadu cambiu de timòne at donadu curagiu a s’assotziu intreu, at mudadu s’assèstu e calchi omine, comente Bianchimano c’at donadu gratzias a s’affiduciàdu donadu: Trombini, bardianu istrantzu li parat s’isbatzinata ma no resessit a mantennere sa bòcia. Apostadu b’est Dossena, una olta capitanu de Casteddu, cussu chi mai perdonat. Olbia 1, Arezzo 0. Sos toscanos abbarrant in zona playoff, sos sardos lassant s’urtimu logu e icomintzant a respirare aria noa…
Podda manna pro sa Brigada Tattharesa chi già a Rimini aiat fatu ‘idere sinnos de istrachesa. Sa binchida in su derby pariat de bon’isperu, pro podere sighire a bisare sa serie B. Ischiamus totu chi Carrara est ‘istada fraigada pro sa pigada manna, ma niune potiat pensare pro sa Torres una rùta gasì in terra toscana: 5-1. Como tocat de accontzare barriu pro torrare a agatàre fàmine e balia perdida, sighire a currere e bisàre…
Mario Bua Capitta, Amistade
