Die iscùra pro sa fùbbal sarda, Casteddu pèrdet gara e onore in sa domo romana de Ranieri. S’iscuja est chi sos sardos abbojant a Roma in su mamentu pius triste de sa capitale sarda, chi dae sa mancada de Gigi Riva paret apat perdidu atza e curagiu. A s’àter’ala invece sa capitale italiana agatat un’eranu nou cun sa furriada de mastru De Rossi comente allenadore. Tando sa sorte puru si ponet in mesu ‘e ‘ia, ca leare una rete cando no sunt galu colados 60 segundos, in su campu de cussa Roma, est unu ciaffu chi lassat su sinnu, àteras bias s’iscuadra aiat remediadu cun sa fortza de su coro e cussa de su disiperu, custu sero no b’at nudda ‘e ite faghere còntra sa forza e sa classe de su carru armadu romanu. Cagliari at perdidu sa semida de su giogu e de un’identidate chi pariat incue accurtzu, bellè che tenta. Como su perigulu est s’oriolu chi giompet a conca e prendet sas ancas lassende su coro in logu desolàdu. E sapadu benit a Casteddu s’àtera iscuadra de sa capitale romana, sa Lazio de Sarri chi de balia no est de mancu a sa Roma. Sa salvèsa at a essere una binchida noa de sa serie A, una promozione fatu a s’àtera. Ma si potet pensare de la giompere semper a su minutu 94?
Sa Torres puru est chirchende sa perdida balia de Brigada Tattharesa, cussa chi l’at ajuada a cumandare su girone sou de sa serie C, sa matessi atza chi l’aiat ajuada a binchere in domo ‘e Zeman e a pareggiare in sae Cesena puru. Como sos romagnolos profitant de sa perdida sarda intro ‘e domo, còntra su Sestri Levante, pro fùire a +9 puntos, bocchende su bisu de sa serie B dereta a sa Torres. Mudat tando su zèlu de sa capitale sarda de su cabu ‘e subra. Tando su play-off est galu in sa possibilidàde de s’iscuadra: su progetu est bonu, bi sunt sos omines, tocat de binchere s’istrachesa fisica e mentale, agatare su famine perdidu in caminu e tando su barriu si potet galu accontzare…
Meda mudat s’arrèjonu pro sos bardianos de su faru terranoesu, chi puru perdende a Carrara 1-0, ant fatu idere sinnos de metzoru in unu de sos campos pius tostos de tota sa serie C. Potimus narrere chi su mastru nou at bogadu a foras dae sos giogadores sa perdida balia. Incomintzant a s’idere tramas de giogu, e singulas personalidades, comente Cavuoti e sa cunferma de unu bardianu mannu mancari galu pitzinnu, Rinaldi. Tzeltu Olbia abbarrat sola in su penurtimu logu de sa classifica, ma su sentidu como est mudadu est àteru dae cussu de sas urtimas garas e lassat bon’isperu. Resessende a bogare puntos a fora dae Ancona, dominiga chi benit, tando si potet abbaidare a su caminu de sa sa salvesa cun ispijitos nosos…
Mario Bua Capitta, Amistade
